مفتاح الفالح (ياراضيين العار )

السلام عليكم ورحمة الله وبركاته .

خيرات عليكم .

ختام مشاركاتي اليوم هذه القصيدة الصارخة برسالة

جادت بها قريحة الشاعر الصديق الرقيق المبدع القدير

( مفتاح الفالح ) الى زعماء وقادة الامة العربية والأسلامية

وبعث لي صديق بنسخة منها تقول أبياتها :

ياراضيين العار=يكفيكم ركوع وشجب وأستنكار

المفروض تختشوا .

**

ياباردين الحيل=ياحانيين الراس لأسرائيل

داسوا القدس وقتـّلوا العويل=أن كان تفهموا وصلوا لعقر الدار

يامدمنين الشجب والتاجيل=يابايعين العرض يافجّار

أصبح كامبودايفيد خذاكم سيل=عرف أخداعكم طفل الحجاره ثار

**

ياراضيين الظلم=وم اللي ظلمكم تطلبوا فى السلم

وفى كل قمّة تحلموا فى حلم=وفى كلّ قمّة مالكم دبّار

وفي كل قمّة إيسير فيكم شلَم=وفي كل قمّة ساسكم منهار

وفي كلّ قمّة أمضيّقين العلم=وفي كلّ قمّة طالعين أصفار

**

ياسبب تلطيخ=لَمجاد لوّله والشرف والتاريخ

يامن تغاضيتوا عليه صريخ=أطفال عزّه دالهم جبّار

يامن كملتوا قتل وأتصخصيخ=ياعايشين أذناب الاستعمار

يامضيعة ميعاد شرم الشيخ=يامضحكة باراك والدولار

**

ياباذلين الجهد=فى كل مايغضب الواحد الاحد

ياقاتلين أمالنا فى المهد=ياقهر الامّه يااعداء لَحرار

ياويلكم منه نهار الصهد=نهار أنتغابوا ياوقود النار

**

ياعايدين الكرّه=ياحانيين الراس ميّة مرّة

فضحكم الواقع والقناع تعرّه=وضحت الصوره ماأهناك أعذار

لالكم أنجاز ولا صنعتوا ذرّه=فى أعيون الاطفال الصغار أصغار

وكمّين طفل بريء مات كيف "الدرّه"=ولاعند توّا ماأوخذله ثار

**

ياأقلال الهمّه=ياأكبار الامّه ياتعاسة الامّه

يااللي أمريكا لبّستكم عمّه=ماترقدوا ليله بلا أحتقار

يااللي ألتمّيتوا أطناشر لمّه=يقنع ويرفع ويش فيهن صار؟!

كيف ماأتجوها تطلعوا م القمّه=ماتزعجوا ليهود ولا أبقرار !

قليل عندكم عَرض الانسان ودمّه=هدفكم أفلوس وجاه وأستقرار

تعبان وضعكم مُخجل ومُخزي تمّا=ولَعند توّا نومكم ماطار !

**

ياخيّان=يابايعين القدس للعدوان

لوكان عندي فى الأعلام مكان=ونقدر أنقول الشعر بأستمرار

مجنون ملتزم شاعر بلا عنوان=حتى فى النقابه صفر عااليسار

وكان هذا نشناكم الاّ أشنيان=وكلّ يوم نفضحكم بعد لاخبار

ياواصلين لمرحلة الادمان=ع الخوف والحياء فى ظلّ الاستعمار

ايّاكم أجتنبوا غضب لَمريكان=فيه خوف ع الكرسي وفيه حصار

خلّيكم أحذاه وروسكم صوّان=ووجوهكم أصحاح وطبعكم غدّار

مرّات يهجروكم فى المضاجع كان=بلا أموافقه منهم دعمتوا جار

لعنكم التايب لاسمع لاذان=والمسلم العاصي لا قعد فى البار

خدعتوا أمعاكم شعب كي الجّران=إيزغرت وهو مشيول فى التيّار

» الشاعر مفتاح سليمان الفاخرى
» التشجيع والثناء مفتاح الشخصية السليمة للطفل