الشاعر اللى مايمس فيك مشاعر ...لاتسمعه لاتقول عنه شاعر

الشاعر اللي ما يمس فيك مشاعر
لا تسمعه لا تقول عنه شاعر

ما تسمعله ..
لا تجامله في الشعر لا تقرعله
خالي قضية قصته مفتعله
مذنب إلا بذنب ماهو شاعر
يصعب عليه الدرب كان أستعله
ينزل مع الساهل يسيب الواعر .

.. الشاعر فايد لاصيفر التمامي ..
.. ..

مشاركة الشاعر بوبكر بوحويه المغربي :

الشاعر اللي مايلمسك من جوه
أشبوب صيف ما يروي العطاشه نوه
أن كانك بعثته ياكلك بـ الدوه
لا من أقطافه مستحي لا جاعر
لا قافيه لا وزن لاهو قوه
جميع عين في غربال عقله قاعر
لقط درب غابي فيه ميه هوه
أمعاه راح ومسيب الدرب الناعر

.. ..

مشاركة الشاعر الشيخ بشير علي التمامي :

فيه شاعر بايخ
ني نقولك مجنون و إلاه دايخ
يجيب في كلام ضعيف بنيا خايخ
لاو مستحي ع الوجه لاهو جاعر
لا يشوخ لامن قبل قالوا شايخ
قليل عرف ومخاطي الدرب الناعر .

.. ..

مشاركة الشاعر العابد بوخماده المغربي :

الشاعر اللي مايلمسك بلحجه
سوا طق والله قول و الله دجه
علي قيس ماتقدر كلامه وجه
وقوله هذا باخس وهذا ساعر
وان كانك أنجيت أنت برأيك نجه
حتى ان كان دربك فـ أخره يستاعر .

.. ..

مشاركة الشاعر سالم درياق الفرجاني :

ماهي دوه ..
من قبل قايلها وماو من توه
الشاعر اللي مايلمسك من جوه
تلقاه بكلامه دلو شعره قاعر
الشعر ميزته ماهو كلام املوه
ولاهو علل ساهل و لاهو واعر
ني الشعر عندي يارفيق أمروده
وخلطة مواقف صادقة ومشاعر .

.. ..

مشاركة الشاعر مهدي لاصيفر التمامي :

ماتقول شاعر عنه ..
الشاعر الفارغ شكل ياما منه
حتى لو قعد طول الحياة يستنى
ما يعترفبه شخص ناقد جاعر
الشاعر المقنع تنبسط من فنه
كلامه مثيل اللعب ساهل واعر .

.. ..

مشاركة الشاعر إبراهيم دبوب الفرجاني :

الشاعر اللي ما هزه ..
وجداني ورده بـ الكلام و دزه
حشآ من أسمعني ع الاسماع تهزه
وهي هازيه الاسماع طبلة قاعر
طار الحمام و صفقي يا وزه
خليت الساحة فرصتك يا ذاعر .

.. ..

مشاركة الشاعر عبدالسلام بلحاج المقرحي :

اللي ما يخلل فاهق ..
من اللي تظل ع الروح منها شافق
أسماه في صحيح الشعر هاوي طاهق
بوبح بروحه غير ماهو شاعر .

.. ..

مشاركة الشاعر أدريس مسعود العبدلي

مو بالصيفة ..
ولا بمجازة الحبل لا الوضيفه
ولا بالمأسي ينتهي تخريفة
وما يجيب غير القدر عمقا جاعر
معدن اجواد نضيفه
نزيه صاحبة واضح طريقا ناعر
بالعز فاي مجال جا توصيفه
بلا مسلقه وتزييف حتى ان واعر
ما يشد لو يلفت نضم تقييفه
لا شعر لاهو من خواطر شاعر

منقوله

» الشاعراللى مايمس فيك مشاعر
» الشاعر ابراهيم بوجلاوى (شايلينك وانتى اللى شيالة )
» الشاعر مفتاح سليمان الفاخرى
» هما هما نفس الوجوه اللى اتجيب الغمه
» الشاعر المرحوم : عبد المطلب الجماعي